Ilifa Lendawo Lobukhoboka
Abantu abangamakhoboka abasebenza eluphahleni eKapa, ngenkulungwane ye19. Umfanekiso: E 1933, OoVimba beNtshona Koloni kunye neNkonzo yeeRekhodi
Ngalo mboniso sinika imbeko kumawakawaka abantu abasuswa ngenkani emakhayeni abo kwiindawo ezahlukeneyo zaseAfrika naseAsia kwaye baba ngamakhoboka eKapa, kunye nabo bazalelwa ebukhobokeni ekuhlaleni; abathi baba negalelo kwintlalo, ulwakhiwo, uqoqosho kunye nemeko bume eyakhiweyo yaseKapa naseNtshona Koloni.
IProtea Village, eKirstenbosch ekuqaleni kwenkulungwane yama20. Umfanekiso: AG 15148, OoVimba beNtshona Koloni kunye neNkonzo yeeRekhodi.
Ilifa lobukhoboka laseKapa lingqamana kumagama ethu nakwiifani zethu, amasiko ethu, umxube wokutya esikutyayo, umxube wolwimi esiluthethayo, umculo wethu kunye neenkolo esizibenzisayo.
Isikhumbuzo soSuku lweNkululeko, ngowe1904. Umfanekiso: E 7892, Uvimba-mpepha weNtshona Koloni kunye neNkonzo yeeRekhodi
Uluntu lwasezidolophini nasemaphandleni kuyo yonke iNtshona Koloni luyaqhubeka nokukhumbula ukuphela kobukhoboka. Endaweni yokuba abanye bethu baye kwizikhumbuzo zonyaka ngomhla woku-1 kweyoMnga, sonke kufuneka siqwalasele indlela okuye kulibalekile kwaye kungakhathalelwa izolo 'lobukhoboka' libumba uluntu kunye nelifa lethu hayi kwiNtshona Koloni kuphela, kodwa kuMzantsi Afrika ngokubanzi.
Ubukhoboka buwubumbile uMzantsi Afrika kwasekuqaleni kwimbali yawo yobukoloniyali kwaye inike uninzi lweebhloko zokwakha uluntu olusekwe kwingcinezelo yobuhlanga. UCalucalulo olusemthethweni lwanyanzeliswa ngaphezulu kwenkulungwane emva kwenkululeko yamakhoboka. Imithetho emininzi yoCalucalulo, efana neGroup Areas Act kunye nemithetho yamaPasi yayisekwe kumthetho olawula bobabini abangamakhoboka kunye nabantu bomthonyama abahluthwe umhlaba.
Iintsimbi 'zamakhoboka' ezifumaneka kwiindawo ezahlukileyo kwiNtshona Koloni iphela zisikhumbuza ngokuma okukhoyo kubukhoboka. Umfanekiso: J 3767, OoVimba beNtshona Koloni kunye neNkonzo yeeRekhodi
Ilifa lobukhoboka liyaqhubeka nokubumba izimvo zethu. Oku kusibizela ukuba sivule ingxoxo kwaye sithathe inyathelo lokuphelisa intlupheko kunye nokwenzakala kwesizukulwana, ubundlobongela obusekwe kwisini, ucalucalulo ngokobuhlanga kunye nezenzo zocalucalulo kwezolimo nakwimizi-mveliso yabasebenzi.
Ngaphandle kweemeko ezinzima zobukhoboka kunye nocalucalulo oluqhubekayo kunye nezithintelo ekukhetheni kwabo ubomi emva kokukhululwa, ookhokho bethu ababengamakhoboka babonisa ukomelela okukhulu ekunyukeni ngaphezulu kobunzima obugqithisileyo. Igalelo elixabisekileyo kwintlalo-ntle nakwezoqoqosho kuluntu lwethu lwangoku kuninzi lwabemi boMzantsi Afrika abayinzala yabantu ababengamakhoboka eKapa kufanele ukuba kusikhuthaze sonke ukuba sakhe ikamva elingcono kunye.