James Barry
18de en 19de eeu
Skets van Dr James Barry. Beeld: Welcome Library, London
“Moenie wat ek sê evalueer in die lig van woorde wat deur ’n jongman uitgespreek word nie, maar besluit eerder of my bespreking met jou gevoer word deur ’n man wat insig toon.” － James Barry in die kommentaar by sy mediese tesis.
Margaret Buckley is in Merchants Quay in Ierland gebore. Sy het vir haarself regoor die Britse Ryk naam gemaak as ’n militêre snydokter, maar nie as Margaret Buckley nie.
Meisies kon nie in die 18de en 19de eeu die mediese veld betree nie. Die jong, 20-jarige Margaret het haar as ’n 12-jarige seun, genaamd James Barry, die seun van haar oorlede oom met dieselfde naam, vermom. James Barry
het toelating gekry tot die Edinburgh Mediese Skool. Hy het sy graad in medisyne voltooi en na Londen verhuis om ’n vakleerlingskap te voltooi.
James Barry is in die openbaar, sowel as in private hoedanigheid as ’n man aanvaar, ten spyte van sy kort liggaamsbou, gladde gesig en hoë stem. Hy het by die Briste Leër aangesluit as ’n hospitaal assistent en het in Chelsea en Plymouth gewerk voordat hy in 1816 na die Kaap van Goeie Hoop verplaas is. Hy was aanvanklik met sy aankoms in die Kaap ’n hospitaal assistent, maar dit was nie lank voordat hy bevorder is tot persoonlike dokter van die goewerneur Lord Charles Somerset nie. Hy is ook bevorder tot koloniale mediese inspekteur.
Barry het in die Kaap die eerste suksesvolle keisersnit in Afrika uitgevoer waar beide die ma en kind oorleef het. Hy was veral gemoeid met die minderbevoorregde ma’s van die gemeenskap en was daartoe verbind om die mediese praktyk van die verskeie hospitale in die Kaap en die res van die Kolonie te hervorm.
Barry het die bron van die swak waterstelsels in Kaapstad, wat siekte veroorsaak het, geïdentifiseer. Hy het hard gewerk om die lewensomstandighede van die melaatsekolonie by Hemel en Aarde en dié van gevangenes en soldate te verbeter. Barry is in 1827 tot chirurg bevorder en het tien jaar lank in die Kaap gewerk voordat hy in Mauritius, Jamaika, die Wes-Indiese Eilande, Malta, Corfu, St Helena en Kanada diens gelewer het.
James Barry het die tweede hoogste rang behaal wat aan ’n dokter in die weermag gegee is, naamlik dié van inspekteur-generaal. Op sy sterfbed het Barry daarop aangedring om begrawe te word in die klere wat hy tydens sy dood aangehad het. Hierdie versoek is egter geïgnoreer en die vrou wat sy liggaam voorberei het om begrawe te word, het Barry se vroulike identiteit ontdek.
